Oifigearan poileis an eilein a’ neartachadh sgilean Gàidhlig le OGE a Tuath, an Iar is Innse Gall

’S iad oifigearan poileis am buidheann as ùire às na h-Eileanan Siar a tha ag ionnsachadh na Gàidhlig air-loidhne tro na cùrsaichean Gàidhlig làn-mhaoinichte aca, le taic bho Bhòrd na Gàidhlig.

Tha am prògram a’ toirt cothrom do dh’oifigearan ceanglaichean nas làidire a thogail leis na coimhearsnachdan a tha iad a’ frithealadh agus aig an aon àm a’ meudachadh cleachdadh na Gàidhlig ann an seirbheisean poblach. Tha e cuideachd a’ toirt taic dhaibh a bhith a’ chleachdadh a’ chànain nan eadar-obrachadh làitheil aig an obair agus taobh a-staigh nan coimhearsnachdan aca.

Gu ruige seo ann an 2026, tha 127 oileanach air clàradh air cùrsaichean maoinichte le Bòrd na Gàidhlig aig OGE a Tuath, an Iar is Innse Gall, a’ gabhail a-steach luchd-obrach bho OGE, Comhairle nan Eilean Siar, Comhairle na Gàidhealtachd, NHS nan Eilean Siar agus Poileas Alba. Tha cùrsaichean cuideachd air an tabhann an-asgaidh do phàrantan le clann ann am Foghlam tro Mheadhan na Gàidhlig.

Thuirt An t-Àrd-Cheannard Ross McCartney, Ceannard Sgìreil airson nan Eileanan Siar: “Tha sinn a’ tuigsinn cho cudromach ’s a tha dualchas is cultar nan Eileanan Siar agus tha sinn airson seo a ghabhail os làimh cho mòr ’s as urrainn dhuinn, gus a bhith a’ comharrachadh nan coimhearsnachdan anns a bheil sinn a’ fuireach agus ag obair.

“Tha triùir oifigearan an-dràsta a’ dèanamh a’ chùrsa agus bu mhath leam taing a thoirt do OGE Ceann a Tuath, an Iar is Innse Gall agus Bòrd na Gàidhlig airson an taic. Leanaidh sinn oirnn a’ tabhann a’ chothroim seo do dh’oifigearan a tha an dàrna cuid a’ gluasad dha na h-eileanan no a tha stèidhichte an seo mu thràth, agus a tha airson Gàidhlig ionnsachadh.

“Tha sinn a’ faicinn seo chan ann a-mhàin mar chothrom dha na h-oifigearan againn an cànan ionnsachadh, ach cuideachd mar dhòigh air cnapan-starra a lùghdachadh a thaobh obair poileis agus neartachadh co-leanailteachd coimhearsnachd le bhith ag àrdachadh comas cànain nan oifigearan ionadail a th’ ann mar-thà sa chànan.”

Thuirt Angela Weir, Òraidiche Gàidhlig aig OGE a Tuath, an Iar is Innse Gall:

“Tha sinn air leth toilichte fàilte a chuir air oifigearan Poileas Alba bho na h-Eileanan Siar chun phrògram Gàidhlig air-loidhne againn. Tha ionnsachadh na Gàidhlig mu dheidhinn barrachd na dìreach cànan, tha e mu dheidhinn a bhith a’ gabhail ri cultar, dualchas is dearbh-aithne nan eilean. Tha sinn an dòchas gun cuidich an iomairt seo oifigearan gus ceanglaichean a neartachadh leis na coimhearsnachdan a tha iad a’ frithealadh agus gum brosnaich e barrachd cleachdadh den Ghàidhlig ann am beatha phoblach.”

Thuirt Ealasaid MacDhòmhnaill, Ceannard Bhòrd na Gàidhlig:

“Tha Bòrd na Gàidhlig air leth toilichte faicinn an àireamh dhaoine sna seirbheisean poblach againn a tha dealasach mun Ghàidhlig ionnsachadh tro OGE a Tuath, an Iar is Innse Gall. Tha e a’ comharrachadh cho cudromach ’s a tha e a bhith comasach air a bhith an sàs gu h-èifeachdach sna coimhearsnachdan againn. Tha mi a’ guidhe gach soirbheachas dhaibh air an turas ionnsachaidh cànain.”

Is iad na h-oifigearan a tha an-dràsta a’ gabhail pàirt anns a’ chùrsa Ulpan:

• Àrd-neach-sgrùdaidh Ross McCartney, stèidhichte ann an Inbhir Nis
• Neach-sgrùdaidh Euan Cowan, stèidhichte ann an Steòrnabhagh, à Annan sna Crìochan o thùs
• PC Suzanne Blackie, stèidhichte ann am Barraigh, à Lodainn

Tha cothroman ionnsachaidh Gàidhlig a bharrachd gan lìbhrigeadh do luchd-obrach na roinne phoblaich agus do bhuill a’ choimhearsnachd mar phàirt den phrògram nas fharsainge agus thèid an cur air bhog a dh’aithghearr.

Tha an obair seo a’ toirt taic do sholarachadh Gàidhlig nas fharsainge aig OGE a Tuath, an Iar is Innse Gall, a’ gabhail a-steach prògraman ceuma agus Teagasg tro Mheadhan na Gàidhlig PGDE, a’ cuideachadh le bhith a’ cumail suas agus a’ leasachadh na Gàidhlig airson ginealaichean ri teachd.

Gus tuilleadh fhaighinn a-mach mu na cùrsaichean goirid Gàidhlig againn tadhail air.